入咗戲院發現悶戲一場，大家會點樣打發時間呢？𠝹凳激得嚟kill唔到time；瞇埋眼大覺瞓？未必即時瞓得着㗎！索性拎手袋走人？畀咗錢㗎，係咪有啲唔抵呀？相信唔少人會去廁所唞吓氣，希望捱少兩幕爛戲。估唔到林鄭噚日喺立法會宣讀政改第二階段諮詢聲明，都有兩位官員中途開「小」差；乜呢幕政改諮詢大龍鳳，真係悶到咁？
在席官員聽到呆滯
政府雖然噚日先正式公佈第二階段諮詢建議，但由於一早喺坊間放風打底，所以內容一啲驚喜都冇。林鄭去立法會宣讀聲明都似行禮如儀。
八方聽到猛打呵欠，在席官員亦個個一副呆滯樣，但財金系官員卻好精靈，企圖用行動「掩飾」嫌悶嘅心態。
話說林鄭讀咗聲明未夠半個鐘，開始到議員諮詢時，財政司司長曾俊華突然唔見咗人。八方以為佢因公事提早走先，但不消幾分鐘又歸位。
其後佢嘅直屬下屬財經事務及庫務局局長陳家強，唔知係咪有樣學樣，突然又失蹤咗一陣，之後先返位聽埋呢場政改騷。八方四出打探，獲告知兩位財金官員離席期間都係小解箒。到底係咪真係有需要？答案唔重要吖，最重要係佢哋冇離場或瞓着，畀足面排排坐撐場撐到尾。
李八方
mailto:[email protected]