冠君產業信託（2778）主席羅嘉瑞曾經做過心臟科醫生，後來被阿爸叫返香港打理家族生意先至從商，大家𠵱家都會叫羅嘉瑞做Dr.Lo。原來Dr.Lo除咗識得醫人，亦都醉心於古典音樂。
三年前開始，佢就邀請不同音樂家，喺冠君旗下中環花旗銀行廣場免費表演，今年仲搵來香港最年輕鋼琴演奏博士之一查海倫做音樂總監，十分認真。
2012年至今，花旗銀行廣場辦過百場音樂會，每逢周五舉行，聽聞Dr.Lo不時去欣賞，工作人員要預留座位畀佢，佢仲試過技癢上台，冇睇譜彈蕭邦《夜曲》，技驚四座。
今年佢專登搵來查海倫做音樂總監，策劃全新嘅黃昏古典音樂會系列，逢周五6點開始，表演約一小時，本周五就有薩克管與鋼琴二重奏，唔知Dr.Lo到時會否現身又露兩手呢？