頭兩場開晒內檔馬，第三場四班千二米大反底，一對中外檔馬「銀飛龍」同「萬醒駒」後上包辦1,641.5元冷Q，灰馬「銀飛龍」爆46倍大冷win於同程連捷，大馬主蕭百君家族今季兩win都係靠呢匹團體馬，其餘十多駒統統未贏過。
田泰安今場爆到杰撻撻，補番第二場爆唔到「勇戰」只做阿二條數，至於「萬醒駒」追極都追唔到「銀飛龍」，今季繼續淨識跑位置冇馬贏，第三名則由後備補出代替「自然旺家」之1檔馬「心花怒放」拎到。
「萬醒駒」出親王牌跑谷草多數上到名，六歲馬一向好鬥心，今場更加恨贏恨到追住頭馬「銀飛龍」嚟咬。拉士短兵相接之際，「萬醒駒」可能見「銀飛龍」係灰馬，同自己唔同色，突然馬頸擰向內側，連續兩下噬向「銀飛龍」頸部位置，杜利萊隨即抽番住「萬醒駒」至停口，鏡頭有啲滑稽。幕後呢鋪隨時有手尾跟，事關「萬醒駒」陣上咬馬早有前科，高伯新畀受薪董事警告過，呢晚此駒故態復萌，競賽小組必然有所行動。
蕭百君則笑說沒有想過老馬「銀飛龍」可以連赢兩場，非常意外，此馬是他們一家人在香港拍賣會投得，蕭百君細仔蕭劍新表示，徐雨石保養該駒狀態功力一流，希望下半季家族其他馬也可交出表現。