港交所將在1月10日測試滬股通沽空系統，計劃本月正式推出。之前因為A股升勢太急，而無法上車嘅戰友，或者可以考慮掉番轉頭做，靠沽空發圍。內地股市假數多，唔少股份又被炒到癲，造淡似乎值博率更高。
內地2010年已經有融券（即沽空）業務，但成交極少，靠造淡搵食並非主流。
除咗市場心理習慣以外，唔少上市公司與地方政府利益相關，內地政府壓打沽空機構亦係主要原因，多次有調查人員被當地公安拉，甚至判刑新聞傳出。
一直以來，渾水、匿名研究等鬼佬沽空公司，只可以喺美國、香港上市嘅中資股落手，唔敢直接喺A股搞事。
而家度門打開，簡直係阿里巴巴進入寶藏，大把搵食機會。將來地方政府會如何大戰境外沽空機構，肯定好戲連場。
A股大把妖股、老千股，估值又貴，戰友只要做定功課，有收穫機會大增。不過要小心，就算掌握證據，亦唔好喺網上周圍唱。
事關以前有內地股民喺網上公佈上市公司造假情況，結果真係被判坐監，罪名係「造謠」，所以千祈要小心。
李可強