楊千嬅噚日喺銅鑼灣為今個月24號開騷嘅紅館演唱會綵排，千嬅自爆因為全心全意綵排，近排冷落咗老公丁子高，搞到老公成日做埋啲古怪行為惹佢注意，佢話：「佢會突然話肚餓叫我煮個麵佢食，又或者突然話間房亂叫我執吓，佢每次講完就會俾我鬧，但佢俾我鬧完又會好爽。」咁老公會唔會做演唱會嘉賓呢？千嬅話已經親自請晒嘉賓，不過要保持神秘唔公開住，如果老公做嘉賓就唔只唱一首歌：「佢實唱成part！我𠵱家學緊製作，諗住第時幫佢開演唱會，到時就可以好似葉蒨文同林子祥咁拍住唱。」
預告嘉賓有驚喜
千嬅話到時會有個好有驚喜嘅神秘嘉賓現身：「佢答應我做嘉賓嗰陣，我都好驚訝。」早排黃秋生就鬧爆𠵱家好多歌手唱歌唔掂，唱live唱到走晒音，千嬅到時會唔會請秋生嚟睇自己個騷，叫佢點評呢？千嬅就話：「我一向唔會自己請人嚟睇，呢啲都係交畀公司公關安排，但如果係咁，好多嘢都要check。」
撰文：馮仁昭