普多斯基喺阿仙奴越嚟越少上陣機會，月初終於解脫，投奔意甲加盟國際米蘭，亦喺周二馬上登場。普多似乎冇喺兵工廠雪到硬，呢場作客祖雲達斯嘅意大利國家打吡後備入替，而且表現唔曳，落場冇耐之後國米就入波扳平，結果亦以1:1賽和祖記，呢粒德國吉星認真腳頭好。
普多入替激活前線
周二繼續上演歇冬之後首輪意甲賽事，壓軸由祖雲達斯主場迎戰國際米蘭。國米由文仙尼回歸執教，點都會趁1月執執個陣容，而普多斯基就係佢第一位羅致嘅新兵，今場波亦即刻可以喺後備席候命。
榜首祖記喺5分鐘就先開紀錄，曾經係文仙尼麾下嘅泰維斯，接應維達爾嘅靚傳送而近門射入。國米喺上半場表現唔多似樣，一次命中目標嘅射門都冇；到易邊後9分鐘，文帥派出普多斯基入替古斯曼奴域，即刻刺激到國米嘅進攻，仲喺64分鐘由前鋒莫路伊卡迪扳平。普多喺扳平一球雖然冇直接功勞，但落場後表現相當活躍，其中喺81分鐘最具威脅，佢左路發難殺入禁區之後橫傳，點知莫路伊卡迪近門鏟射竟然喺柱邊出界。最終兩隊踢成1:1平手，喺榜首地頭拎1分走，對國米同普多斯基嚟講都唔係壞事。
完場前仲有小插曲，國米前鋒奧斯華度因為唔滿意伊卡迪喺一次快攻，唔交波畀佢而自己起腳，嬲到想衝去打佢咁滯，好在有隊友截住。
祖記優勢僅剩1分
文仙尼賽後都有讚吓普多：「佢加盟冇耐，同新隊友一齊練習時間唔多，身體亦未係十足狀態，但我睇好佢好快會喺國米有好多貢獻。」國米喺5、6年前曾經令鬱鬱不得志嘅球員變身成為奪冠功臣；接收巴塞隆拿人球伊度奧，同埋皇家馬德里棄將史奈達之後，結果球隊靠佢哋贏得歐聯冠軍。今次普多轉投國米，大家好期待呢位德國國腳會喺足球事業第二春。
至於祖記喺歇冬前已經頻頻失分，由於羅馬喺周二早場靠爭議入波作客1:0小勝烏甸尼斯，𠵱家祖記只係得番1分領先優勢。
識睇，一定係睇足英台【英波Live】：
http://soccer.appledaily.com
http://bit.ly/engballlive