莫文蔚（Karen）去年九月舉行暫別舞台演唱會，原以為是要退休過幸福人妻生活，「三個月唔做嘢對我嚟講已經好長。」三個月與德籍老公Johannes兩人遊遍南半球，Karen曬得一身古銅，散發陽光朝氣之餘，晒恩愛時同樣耀眼。充足電後Karen立馬回到工作崗位，最新專輯網上發行，以離別為題，主打歌名為《不散‧不見》沒有打錯字，早定好的主題，遇上爸爸離世，讓Karen對再見有着不一樣的看法，「say goodbye唔一定係傷感，可以有重新出發、迎接新未來嘅意思。」
造型、撰文：鄧卓嶽
攝影：郭賢興
化妝：Kerry of Zing Makeup School
髮型：Kiff Lui of Pop Eight
「《不散‧不見》呢首歌錄音嗰陣我錄到起晒雞皮，真係好touch到我。」尤其當去年初Karen爸爸莫天賜的離世，令她體會更深，「其實冇話刻意去講，確實開始造呢張專輯，一早定咗departure呢個方向，之後遇到爹哋突然離開，呢件事對我有好大衝擊，令我開始諗好多關於說再見，或者係嚟唔切說再見嘅問題。」入行超過二十年，現在出唱片亦只為了做自己想做的事，表現最真實的一面，「以前覺得唱歌似演繹緊一個故事嘅人物，但係今次比較personal，好似將內心世界倒晒出嚟。」
放下塵囂覓靈感
自命工作狂的Karen總是按捺不住放不下工作，難得下定決心放長假，今敞旅程籌備整整一年，Karen特意挑選南半球的陌生國度，遠離塵囂，「𠵱家大家太依賴電話、wifi，所以特登去啲山旮旯地方，電話訊號都未必有，過吓返璞歸真嘅生活，同埋陌生地方可以得到更多靈感。」
三年婚姻生活，Karen坦言學懂了平衡生活，「以前所有精神放喺工作，唔使懷疑。我唔會覺得嗰陣時係錯，只不過人生唔同階段有唔同嘅priority。𠵱家知道朋友、家庭、愛情都係咁重要，我會刻意提醒自己去兼顧唔同嘅嘢。」
遠距離保鮮婚姻
常與Johannes分隔兩地，各有各忙，然而每次見面總是如此甜蜜，的確難得。「一向讀書、工作都係四圍走，同一班人合作完，馬上say bye bye跳去同另一班人相處，因為咁樣會畀到我energy，如果停喺一個地方，我覺得好似喺度兜緊圈，所以不停地出發去下一個journey，可能係咁，會特別珍惜相處嘅時間。」當然除了給予彼此空間，保鮮關係還是需要誠意，「老公之前有買書自學國語，之後又有請家教練習，同埋有我呢個咁好嘅老師，𠵱家佢仲識唱《忽然之間》段chorus。」
老公上一段婚姻有三名子女，後母這個角色對Karen來說非常新鮮，「𠵱家社會對stepmom嘅睇法都唔會太拘謹，其實佢哋十幾廿歲好大個，都讀緊大學，唔會好似同小朋友溝通，反而似多咗幾個朋友，呢種關係幾特殊，我都從中領悟到好多。」
【浪漫歷險遊】
莫文蔚放三個月大假慶祝結婚三周年，意義重大，夫妻相識超過廿載，旅途上她與Johannes經歷了許多浪漫時刻，到海邊看日出；於亞根廷學探戈；在大溪地自由裸泳，愛得坦蕩蕩；在昆士蘭白色沙灘上過一個火辣聖誕；玻利維亞的天空之鏡上把他捧在掌心。不過再浪漫也不及Karen於微博寫上一句「世界歷險，只帶一只行李箱和你」，有老公萬事足。
更多精采時尚內容，盡在 http://add.appledaily.com。