大家仲記唔記得2013年初，一班碼頭工人走去長和系總部、中環長江中心示威，其間仲有學生成功喬裝直上長實（001）寫字樓，事件平息後，嗰年底，超人即刻喺長江中心大堂安裝閘機，喺樓上返工嘅人要拍卡先可以搭𨋢上樓，避免有人隨便走上去。
原來和黃（013）旗下位於夏慤道嘅和記大廈，亦喺舊年10月左右靜靜地安裝咗呢類閘機，時間咁啱係喺9月底佔中開波之後，當時和記大廈面向夏慤道嘅大堂門口已經長期閂閘，之後隨即喺𨋢口裝埋閘機。
話晒和黃大班霍建寧喺呢度返工，加強保安都啱數嘅。聞說，業主事前都冇諮詢租客意見，話裝就裝，原先要求租戶喺舊年12月開始拍卡入閘，不過直到噚日都冇聲氣，華華行過都只係見得個閘喺度。