元旦嗰日,花生友成晚𥄫實商台叱咤樂壇嘅賽果,好想知《撐起雨傘》呢首獲市民共鳴嘅歌,會唔會眾望所歸,全場公投下跑出成為我最喜愛的歌曲?結果冇令花生友失望,「一起儘管不安卻不孤單對嗎?」但勢估唔到,2014年嘅叱咤賽果,竟然被網民熱論,之不過唔係話唔公平喎,反而係話個賽果預示緊香港政局,係真唔係呀?
到底網民點解會有此睇法?原來有心人發現,今年嘅叱咤賽果,激似十年前、2004嗰年嘅賽果。有乜嘢理據?原來至少都有五大相似,包括許志安同時獲得至尊歌曲同男歌手銀獎,當年跑出嘅係《美中不足》,今年則係《流淚行勝利道》。與此同時,女歌手金銀獎分別係楊千嬅同容祖兒;而男歌手金獎同我最喜愛男歌手得獎人,都係第一次攞到呢個獎㗎。
花生友睇睇,又係喎,當年以上兩個獎都由古巨基首次並連下兩城包攬;今次男歌手金獎爆冷由周柏豪攞,最喜愛男歌手則係張敬軒,同樣都係第一次。再加上,我最喜愛組合都係四連霸、以及殿堂級人馬葉德嫻都有得獎兼上台演唱囉,係咪好多相似呢。
嗱,有人就將賽果延伸至政壇,話呢年叱咤後一年,特首董建華腳痛落台;唔知𠵱家政局嘅發展,係咪有機會類似當年嘅翻版?嘩!喺京官都撐特首梁振英「疾風知勁草」之時,呢啲網民嘅臆測,諗吓開心吓當然無妨,但花生友都覺得唔好太大期望,有啲嘢,認真你就輸。
花生友