特首梁振英嘅施政報告，以及財爺曾俊華嘅財政預算案，一向係唔少建制派議員同官員嘅「催眠」良品，但估唔到林鄭月娥噚日份第二階段政改諮詢聲明，催眠能力亦唔惹少，連保安局局長黎棟國亦告「失守」，聽聽吓都瞓着咗，昏睡時間足足長達廿分鐘，其間仲要瞓到成個人傾側，唔少議員同傳媒睇到都呆咗。
發言人：食咗感冒藥
黎棟國會後被問到係咪「閉目養神」時，只係陰陰嘴笑，低頭快閃。保安局發言人其後回應傳媒查詢時就指，其實黎棟國噚日身體唔舒服，會前食咗少少感冒藥，更特別帶咗頸巾保暖，暗示黎局長會上其實只係受藥力影響而瞓着咗箒，唔係專登瞓覺唔畀面林鄭喎。之不過咁，八方都見到好多議員聽聽吓都瞓着咗，唔會個個都係食咗藥要休息啩？