佔領區清場後多名佔領者被捕，多得一班義務律師四出奔走應付審訊。律師團嘅文律師亦忙到氣咳，文律師噚日原本要代表佔旺被捕者去九龍城法院申請訟費，但因事忙缺席，由另一位律師頂替。屬傳統型嘅裁判官羅德泉等咗15分鐘都唔見文律師，開庭時即刻黑晒面，仲命令要文律師「即刻嚟法庭解釋，點解唔嚟法庭，又唔早啲寫信通知」。
文律師梗係即刻趕返嚟法庭啦，羅官叫佢上證人台解畫，佢話因為朝早喺高院做另一單案遲咗，所以先至寫唔切信通知裁判官要換律師。
已經嬲嬲豬嘅羅官一於少理，命令文律師喺今個月14號再到法庭解畫，又話如果事件涉及專業操守，可以交畀專業機構處理。