學蔡衍明話齋，亞視而家爛殼一隻，送畀人都唔要。搞到一鑊粥，牌面睇點都係王征問題。撇除其他政治因素，王征死都唔肯減價放售，情況就似一個高追咗嘅散戶，死都唔肯止蝕，最後個價低處未算低。如果係股票，呢個時候真係放都無謂，再者受影響嘅，只係你個銀包。王征啊！求你快啲止蝕離場，你唔走真係會阻住地球轉，唔好生人霸死牌吧。有色金屬股呢兩日表現好好，中國稀土（769）三個交易日升63%。主要都係受國策推動，話商務部取消稀土配額管理，只需憑出口合同即可申領出口，毋須提供批文。稀土升係合理不過的事，但係大家唔好忽略新出口許可目錄中，鉬亦被取消配額，好自然地洛陽鉬業（3993）亦成為受惠股。另外，阿爺呢幾年都不斷加快為有色金屬行業，淘汰落後產能，相信效果慢慢會逐步浮現，行業長遠前景正面。
除咗國策支持外，公司業績亦唔差，至上年9月止首三季，洛鉬收入52.12億元人仔，見按年升30.5%；盈利14.65億元人仔，大增62.4%。呢兩日個市仲炒緊AH溢價股，以昨日收市計，A較H溢價1.6倍咁多。
國策有支持、基本因素唔差、AH溢價，三個概念加埋應該夠力支持隻股炒上去。股價如突破5.2元阻力，上望11月高位，即5.8元左右。
Fifi
http://www.facebook.com/lovefrystock
本欄逢周二、四刊出