Welcome back!!!如果八方放完長假，一返港就收到好朋友嘅來電話歡迎回歸，都會好感動㗎；但如果歡迎大家返港嘅係警察，唔知仲有冇呢種「窩心」感覺呢？
話說工黨副主席何秀蘭喺平安夜出發去新西蘭，參加姨甥女喺當地舉行嘅婚禮，由於成個家族唔少人都有去，加上嗰度湖光山色好令人陶醉，咪順道玩番幾日過埋New Year，先喺本周一夜機返港。點知佢一落機開返電話，冇幾耐已經收到警方來電，以為警方咁有心歡迎佢回歸，原來係指佢涉嫌召集及組織非法集結，約佢去警署協助調查喎。何EE笑笑口講，一早預咗會被檢控，但奇怪係被扣上涉嫌召集同組織非法集會，強調會「雍容」應對，因為「從容」面對已經係好基本嘅要求。