求驗客手記︰前路凶險 蘇拿吞5蛋

求驗客手記︰前路凶險 蘇拿吞5蛋

普多腳頭好做咗吉星,但另外兩位仁兄嘅意甲新開始就「凶」白一片嘞。蘇拿接手執教卡利亞里,首戰作客巴勒莫慘吞5蛋輸波;AC米蘭送走咗費蘭度托利斯,由馬德里體育會換番阿利斯奧施斯返嚟,結果喺主場1:2輸畀薩斯索羅,真係冇面。
卡利亞里喺歇冬前已經沉咗好耐,結果球會炒咗施文,搵咗蘇拿嚟接任。呢位前車路士射手之前教過韋斯咸同屈福特,今次首次教意甲球隊,結果第一場就輸到大大鑊,不過佢喺賽後都仲好樂觀,話當上一課喎。
A米周二主場迎戰薩斯索羅,啱啱由馬體會借返嚟嘅意大利國腳阿利斯奧施斯,闊別意甲半季之後回家,喺65分鐘後備入替。不過施斯入場冇耐,對手薩斯索羅就由前鋒施蒙尼沙薩建功,射入反勝2:1嘅一球,結果A米喺2015年第一場就輸波,對上一次新一年首仗輸波已經係1997年,香港都仲未回歸。

識睇,一定係睇足英台【英波Live】:
http://soccer.appledaily.com
http://bit.ly/engballlive