多得神級經濟學大師雷鼎鳴提醒，香港人每去一次郊野公園就淨袋兩皮幾，費清當堂迎難而上，不辭跋涉翻山涉水。原來香港郊區真係靚，唔去多啲就枉費雷神曲線保育郊野公園嘅苦衷。
喺今個星期二嘅清晨，費清喺自由攝影師關祝文嘅指路之下，去咗八仙嶺郊野公園毗鄰嘅龍尾泥灘，直擊藍光閃閃照大海嘅自然奇觀。原來藍光係水中微生物受刺激而產生嘅防禦反應，就好似香港成日出現嘅紅潮，都係海藻湧現所致。諗起龍尾將會變成人工泳灘，費清可以喺一片寶藍之間暢泳，浪漫到呢！
#海洋生境災難
不過海藍光嘅形成，據講係源於海水嘅污染，加上氣溫回暖，所以藍光最常見於由春轉夏嘅季節，同埋水質較差嘅水域，越多藍光，海水越少氧氣，海魚就死得快啲。此刻費清凝視住醉人嘅藍光，一種內疚感油然而生，原來我嘅陶醉愉悅係建築喺海洋生境嘅災難上面，咁同藍絲一日到黑為警隊打壓黃絲而鼓掌有乜分別？
點都好，藍光同藍絲都係世間無可避免嘅一部份，大家要觀賞藍光，可以喺天氣回暖又有微風的日子，去到較平靜嘅內海海邊碰碰運氣，要影相嘅就記住帶埋腳架，用慢快門同高ISO呢班海上藍絲嘅異光。
費清 ＃要生計，也要生活 ＃毋忘初衷