民主黨之前改選新一屆領導層，由兩位中青代猛男尹兆堅、羅健熙做副主席，佢兩個噚日同傳媒茶敍，仲着到孖公仔咁登場。
人稱Monkey嘅羅健熙笑稱佢哋一剛一柔，阿尹啱晒搞行動，佢就主力做文宣論述等。上任後首要任務，原來係要搞好嚟緊嘅區議會選舉，阿尹話後雨傘時期要面對民間去政黨化嘅氣氛，好似佔領期間，行得太出俾人話抽水、靜靜參與支持又被批評笠水，講到尾係同民間社會接觸不良，唯一出路唔係再諗咩策略，而係過程中建立信任，同公民社會同行。Monkey都話目前氣氛對泛民區選形勢悲觀，佢哋認為未來本土政策係重要戰場。不過，黨大佬嘅大中華形象深入民心，好難棟支旗鮮明講本土，阿尹話同黨主席劉慧卿協商過，有關政策同操作會交畀佢哋一輩搞喎。講到選舉，佢哋都話資源緊張，嚟緊要落力籌款喎。