李嘉欣同老公許晉亨嘅「貳寶」今季贏過一場，「一寶」則食白果，養馬運只係不過不失；但亨亨堂大佬許晉義就旺得多喇，旗下「聖驛善」季內攞到一冠兩亞一季，表現準到不得了；而另一愛駒「特務飛龍」就更勁，近兩戰全勝，相比前季喺葉廐同上季喺吳廐，今季加盟文家良之後好似變咗另一匹馬咁！
睇番「特務飛龍」前仗喺五班田草1200米開齋，只以頸位力壓處女馬「至尊駿爵」，講唔上係好賽績；但上仗跑四班谷草1200米，不但升高一班對手強咗，而且排最惡劣嘅12檔起步，條件差了卻居然贏得更易，沿途望空冇遮擋下，直路越騎越有，大勝班底高嘅「萬醒駒」兩個馬位，由此可見「特務飛龍」正在不斷進步中。
呢隻馬將會喺今期(6日)夜賽再戰同程，留喺四班孭126磅一啲都唔吃力，排8檔總好過上次12檔，加上騎師巫斯義剛戰騎「精彩鬥士」被網民狂插，稍後要研訊前途未卜，今期夥拍「特務飛龍」一定唔敢亂嚟，隨時幫許晉義三連捷！