【收市閒情】拯救亞視的絕橋!

【收市閒情】拯救亞視的絕橋!

亞視果然係創意工業嘅先鋒!為吊命連旅行團都搞埋,依小女子愚見,亞洲亞洲既然玩轉型,不如就去盡佢!千頌C決定免費獻計,即管睇吓啱唔啱使!

1.玩嘢:
講個秘密俾大家聽,千頌C以前曾經喺亞視做過兼職(非新聞部),當時聽過一個鬼故。

話說某位人兄經常好夜收工,自己一個做到好夜。咁喺佢身處嘅辦公室入面,角落頭個座位,好多時去到夜晚,就會傳出打字聲……但當然,個位係冇人!直到有一日…呢位人兄做嘢做到好炆時,又聽到打字聲…於是佢大叫一句:「好煩呀!收聲啦!咪嘈住晒!」之後啲打字聲就從此消失。

故事真假我唔知,但可以肯定「亞視靈異旅行團」一定有得搞!入場100蚊!過夜300蚊!亞視有戲服(古裝衫一定有)、有藝人,基本上額外成本唔多!反正藝人又試過向空凳發狂掟壽包,有晒做呢類靈異嘢經驗。萬聖節時仲可以搞大佢,分分鐘勁過海洋公園!可與《墳場新聞》合作,宣傳時記住加句:「幸運的話還可以偶遇昔日明星哦!」

2.賣嘢:
旅遊景點冇紀念品賣,成何體統?即係你去迪迪尼,循例都會買隻米老鼠走咁。紀念品主題方面,除咗例牌嘢,以經典劇集為主題嘅產品外,一定一定要賣兩樣嘢,分別係壽包,同埋魚缸產品!點解?你唔係冇睇過《魚樂無窮》呀嘛?

亞視講明自己係為人民服務,咁就為求稱職,一定要大量買入同胞至愛,如奶粉、雙飛人、金飾等。團友回鄉後,可以同人講自己喺電視台鳩嗚,幾咁有型!

3.演嘢:
反正依家廣告賤價賣,咁不如只要俾得起錢,就俾你上去做做埋演員都得!無論你幾靚幾醜,演技好歌藝差,總之一個Package俾你一個時段,租機加50、指定藝人對手戲100,六合彩之子蔡國威另加100。

仲可以俾你揀主題背景,好似影貼紙相咁,Default某啲係免費,要《我和殭屍有個約會》背景加100,要《魚樂無窮》背景加200。仲可以租場俾你搞生日會、婚宴等,包廣告套餐都係999蚊!到時可以學球星大唱:「Happy birthday to me」!

4.洗嘢:
話說亞視有成30個車位,但依家真係車都唔多架。隔離仲有洗車位,就咁Hea喺度真係好浪費囉!所以建議亞視開個「洗車天地」,泊車15蚊粒鐘,洗車20蚊,想同明星姐仔瘋狂洗車?加100!(亞視有咩花旦?UM…唔知…朱慧珊?)

5.炸嘢:
呢個係最瘋狂嘅做法,話晒大家都視亞視為中國嘅電視台,根據成龍所講,「中國的會爆炸」。亞視搞個執笠儀式,到時只要一按機關,成座大樓就會炸冧,到時就可以見到大家最期待的畫面出現。當然,入場費會貴,話晒可一不可再,入場500,前排1000,想做主禮嘉賓?要拍賣,價高者得。俾唔起500蚊?瞻仰遺容睇瓦礫,只需50蚊。

6.Sell嘢:
想用呢啲橋去Sell廣告客?可以搵雷鼎鳴計一計個Budget Plan先,條數包你滿意!

by千頌C@堆填區
http://fb.com/winbigwok