要數去年政界風雲人物，點可以數漏自由黨田北俊？事關佢代表咗好多市民講出心聲，最終仲因為坦率敢言，冇咗個政協位。為免好嘅唔靈醜嘅靈，八方都唔講田少到底講咗乜咯，相信大家心中有數。
而田少打開天窗說亮話，獲高登仔爆like。繼之前有人將無綫神劇《天與地》嘅片尾曲「年少無知」改詞為「田少良知」，力挺田少繼續敢言，更有高登仔製作咗以田少做主角嘅MV，放上網畀大家欣賞。
田少似乎關注高登仔動向，佢噚日喺facebook留言，話前排已經睇過呢份改編歌詞嘞，「但最近先知原來有人整咗個MV，都幾得意！」佢仲大讚𠵱家嘅後生仔好有創意，仲回敬高登巴打：「多謝晒」，表明「我會留為紀念！」唔得阿爺歡心但獲高登仔寵幸，田少輸都變贏。