唔知係咪一切都係整定！謝拉特啱啱上周宣佈，季尾會離開效力咗17年嘅利物浦，當個個認為呢個決定，象徵紅軍一個年代嘅更迭時；周一英足盃第3圈作客AFC溫布頓，呢位神奇隊長梅開二度，助球隊贏2:1晉級，只可以話呢兩個入球，令紅軍球迷對佢更加依依不捨，亦令佢嘅名字變得更傳奇。
一頂一射助紅軍險勝
利物浦其實呢場波表現一般，面對踢法硬朗嘅英乙球隊AFC溫布頓，短傳入滲唔多奏效。不過，喺呢啲困局下，利記都係要靠謝拉特做救世主，佢開賽12分鐘先喺禁區內頭槌頂入，為紅軍先拔頭籌，之後對手有體重達222磅、綽號「肥豬王」嘅前鋒艾堅費華完半場前執雞追成1:1，換邊後謝四又挺身而出，喺61分鐘喺禁區頂射入招牌罰球，再度替紅軍超前，而最後亦維持2:1嘅比數完場，成功晉級。
222磅前鋒爭贏波衫
謝四賽後受訪時好感觸，連我求大俠聽完都有啲心噏。佢話：「從未咁享受過足總盃，可能今年係我最後一次出戰足總盃，所以想走到最後。就算我將來唔再係紅軍球員，都會喺看台上打氣，因為我知道足總盃嘅意義，所以今場踢得咁搏。」紅軍領隊羅渣士賽後被記者問起，英足盃決賽日正正係謝拉特生日（5月30日），佢就話如果利物浦到時可以贏到冠軍，就係送別謝四嘅最佳方式喎。周一足總盃抽籤後，利記第4圈將會對英冠嘅保頓，算係好籤，祝願謝四同紅軍都可以走得更遠。
今場波除謝四係主角，上面提到嘅艾堅費華都好搶眼，呢位身形脹爆嘅「肥豬王」身形好似個波咁，仲要入到波先勁。佢賽前已經話自己係紅軍球迷，仲夢想成真喺賽後同謝四交換到波衫，佢好開心咁話：「我賽前已警告過隊友，邊個同我爭謝四波衫即係同我作對，所以我好順利攞到呢件珍藏。」
識睇，一定係睇足英台【英波Live】：
http://soccer.appledaily.com
http://bit.ly/engballlive