前特首董建華牽頭嘅「團結香港基金會」，噚日宣佈委任商界出身嘅鄭李錦芬（圖）做總幹事。鄭太曾任行政主任（EO），唔做公務員後，加入美國直銷公司安利（Amway），一做34年，由低做起做到常務副總裁，睇晒大中華同東南亞業務；08同09年獲《福布斯》選為「全球百位最具影響力女性」之一。
曾表明反佔中
鄭太3年前退休，做過領匯、海爾電器、瑞士雀巢等公司非執董。03年起做廣東省政協，亦係全國婦聯委員；去年10月接受《文匯報》訪問，表明反佔中，指公民提名唔符合人大決定，董生自然深慶得人，兩人喺基金會噚日發出嘅新聞稿中互笠高帽，董生讚鄭太對國家有承擔、對香港有熱誠；鄭太就話期望喺董生領導下做好工作。基金會做政策研究，有鄭太呢啲鑽石級經理幫忙推銷政策，冇得輸啦。