隔牆有耳:《100毛》紅到攞君子獎 - 李八方

隔牆有耳:
《100毛》紅到攞君子獎 - 李八方

呢期人氣旺盛嘅《100毛》,紅到攞獎。以商科為重嘅恒生管理學院,噚日公佈咗最新嘅「君子企業調查」,選出14個「君子企業金獎」,其中一個好搶眼嘅得獎公司,係黑紙旗下《100毛》。以賣創意為主嘅《100毛》,理所當然獲得好多年輕人畀like,最近令人記憶猶新嘅得意作,或者係佢哋早排竟然搵到夕爺林夕,扮學民思潮黃之鋒上《時代》雜誌嘅封面。
其實呢個君子企業獎,恒管搞咗四年㗎啦,用孔子「君子」、「五德」做標準,再由學生去商場、港鐵站做問卷,今年訪問2,164人,問佢哋喺唔同行業,會諗起啲咩君子企業?傳媒界方面除咗《100毛》,《明報》、《南華早報》都獲金獎。