股神畢菲特喺香港有辦事處呀！講緊嘅係佢旗下Berkshire Hathaway Specialty Insurance（BHSI）舊年底喺太古坊租咗個寫字樓，最近攞埋經營保險業務許可證，可以大展拳腳。華華噚日走去呢間新office睇下，可能新得滯，人影都唔見。
根據BHSI網站，佢哋提供好多款保險，意外、醫療、專業保險都有，公司話，攞到經營保險業務許可證，可以在港同對外經營所有類別嘅一般保險業務。新上任嘅亞洲區總裁Marc Breuil將會來港返工。
BHSI班底好多都係AIG舊部，總裁Peter Eastwood就係AIG前總裁，今次殺入香港，大有機會掀起一陣保險界掘角潮，股神牌頭咁響，請人應該唔難啦！
對於股神粉絲來講，大家最期待將來香港辦事處開張，股神會否來港剪綵，等大家可以見佢老人家一面喇，到時肯定相當哄動。