「玩具大王」蔡志明細女蔡加怡（Crystal）多數出現喺名人娛樂版，雖然話蔡志明投資咗康健國際（3886），幾年前仲安排Crystal做主席兼執行董事，但華華就好少見到佢現身，噚日康健為引入國壽母公司舉行記招，Crystal竟然畀面出現15分鐘咁大把呀。
身穿全黑恤衫西褲嘅Crystal，喺記招準備開始嗰刻先入場，即刻走上台同大家簡單講幾句國壽入股嘅資料，講唔夠5分鐘，就交番個台畀康健行政總裁許家驊繼續介紹單刁。Crystal最初坐喺台下都好專心咁聽，之但係，聽到一半佢就靜靜閃了，全程現身得15分鐘。
其實Crystal已經好畀面國壽，事關康健早排引入卓悅（653）同富邦做戰略投資者時，佢都冇現身㗎，唔通因為要湊BB所以唔得閒？