【村姑大娛塘】美國女歌手Katy Perry同型男歌手John Mayer,自從大前年開始就離離合合多次,但都仲未厭,踏入新一年佢哋又再玩翻撻。兩位上周末前後腳出席朋友嘅飯局,全程Katy都糖黐豆咁黐到John實一實。翻撻之後佢哋就好似好心急過夜咁,John俾人發現完咗飯局後去咗Katy家過夜,到第二日下午四點鐘先至走,打12圈麻雀都唔使打咁耐啦。
Katy去年同情場浪子John分手後,曾經同音樂監製Diplo拍拖,但原來已經分咗手。John曾經喺電台訪問中講過,啲女人咁鍾意翻撻前男友,係因為寧願同個唔鍾意嘅人一齊,都唔夠膽試新嘢,仲話起碼知道男友家個廁所喺邊。咁佢今次去Katy家過夜,都會識路去廁所啦。
而Katy同前老友Taylor Swift反目成仇,除咗因為之前爭舞蹈員之外,佢哋兩個都同過John拍拖,今次John翻撻Katy唔翻撻Taylor,相信兩女仇恨又深啲!
撰文:李村姑