沙田馬場呢日(6日)有11組試閘，最矚目當然是第一組1000米草閘，灰色神獸「和順超影」自11月30日其士盃大熱跑第三後，首次參與試閘，結果喺雷神胯下走勢唔錯，沿途居中，末段衝刺有力，殺入一席第二，走起來大把在手；而高達110分嘅「誰可拼」就配韋達以短頭位力壓「和順超影」勝出，兩隻馬喺今組直路閘排最差嘅1、2檔，但依然雙雙彈開對手之餘，並造出時間57秒2，係全日五組1000米草閘中最快，可見佢哋真係好FIT而且實力超凡。
其中「和順超影」將於本月18日角逐四歲馬一級賽香港經典一哩賽，睇嚟佢已經準備就緒；而「誰可拼」就有可能爭本月25日1600米一級賽董事盃。
另一方面，呢日與「誰可拼」、「和順超影」同組試閘嘅2012、13年兩屆百周年紀念短途盃盟主「鷹之團」，放到末段冇再加速，結果只得第五，走勢不過不失，「鷹之團」去年1月百周年紀念短途盃上陣後缺陣至今，始終難以評估佢好番幾多。