細細個睇卡通片《娛樂金魚眼》(唉，又自爆年齡⋯⋯)，裏邊有款食物叫「炒麵三文治包」，一直覺得係種好詭異的配搭，以為係日本人的古怪發明。長大後有機會去日本，點知又遇唔上，一直無機會食到呢種一直存在於童年回憶之中的食物。也幾乎遺忘了的記憶，殊不知又在最近一次墨西哥之旅被勾起。當日在坎恩(Cancun)某碼頭等船去女人島(Isla Mujeres)，剛好趕不上每小時一班的渡輪，於是在碼頭酒吧前坐低，要了杯啤酒，大口大口灌進還未吃早餐的腸胃裏(真係當係液體麵包！)遠處傳來一陣香味，鐵板上一邊烤着兩塊麵包，另一邊則在煎肉，「烘底」麵包夾上蕃茄、洋蔥、牛肉，再塗上牛油果醬，還加上一把肉醬意粉夾在中間，無錯，係肉醬意粉，根本就同炒麵三文治包係同父異母的兄弟。呢位兄弟叫Torta，西班牙文，即係三文治，也有夾火腿或夾牛油果醬的，是墨西哥人日常常吃的小吃，隨街可見。唔執輸立即落柯打。
兩片麵包之間饀料勁足，一啖咬落去肉汁、蕃茄汁四溢，牙齒切開香脆麵包，然過通過如泥的牛油果醬，再切斷爽脆生菜絲和腍身的蕃茄，還有散亂摻雜其中的意粉，口感好豐富，濃濃肉味又得清新的蕃茄和牛油果作平衡，相當好吃，作為早餐份量剛剛好，還勉強嘗了童年心願。
記者、攝影：曾冠輝