新地（016）前聯席主席郭炳江因貪污案罪成，舊年底被判監5年，在此風雨飄搖之際，佢個仔郭基煇（Adam）斥資7,662萬元增持新地，似乎想穩定公司內部軍心，亦畀市場一個正面訊息。
按聯交所資料，Adam喺舊年12月30號透過信託基金Thriving Talent，增持65萬股新地，平均價117.878元，即係動用超過7,600萬元。今次係新地官司審結後，第一次有家族成員增持。增持後，呢個信託基金持有新地6.72%。
新地郭氏三兄弟爭產風波後，新地大股東以多個信託持有股權，外界基本上唔多清楚邊個打邊個，𠵱家應該可以肯定呢間Thriving屬於郭炳江一家嘅。
新地官司後，郭家有意無意出招穩定市場信心，好似郭老太本周日就現身ICC，參觀公司東涌新盤東環嘅示範單位，𠵱家就係郭炳江個仔增持，應該好快輪到主席郭炳聯。