天氣不似預期，同事小魚噚日猛嗌好熱，「又話小寒嘅，咁鬼熱㗎」。查實，噚日小寒唔只唔寒，仲要好可能大半世紀以來最熱嘅小寒㖭。
古語云，斗指戊為小寒，時天氣漸寒，尚未大冷，故為小寒。不過，香港天文台話，中國廿四節氣反映嗰段季節常見嘅天氣現象或農業活動而命名，但某程度上只係反映古代中原地區氣候，未必完全適合香港呢個南方地區。
天文台由1947年有紀錄以來至今，小寒當日平均溫度都有21.2℃，真係「小小都唔寒」，錄得最高溫度係2000年，最高23.4℃。不過，截至昨晚8時，噚日下午1點左右喺天文台就錄得最高23.9℃，雖然天文台未公佈最終統計，恐怕都好可能係有紀錄以來最熱嘅小寒喇。
＃今晚跌至15℃
究竟廿四節氣準唔準？古代中原大約指現今河南省一帶，費清上網睇吓河南鄭州氣溫，只有最低-2℃，至最高7℃，的確係開始進入寒冬喎。
不過咁，天文台話根據紀錄，香港最凍嘅日子，往往都係喺小寒直至大寒之間，所以小寒後大家就要有準備開始踏入寒冷天氣喇。咁啱，天文台都預測今日天氣開始再轉凍，晚上最低跌到15℃，相差噚日成9℃㗎。
費清研究緊小寒之際，另一同事小雯就話以為前日先係小寒，細問之下原來因為時代廣場2015年日曆，印錯咗小寒係1月5號，唔知係咪因為小寒喺每年1月5至7日之間，佢哋大意印錯咗呢？
費清 ＃要生計，也要生活 ＃毋忘初衷