又有內房股面臨爆煲，今次佳兆業（1638）呢單野真係夠離奇，主席因「健康理由」辭職，通常呢啲情況，即使係違約，如果債權人係信得過間公司嘅，都會同公司再傾過啲條款，但滙豐連傾都費事傾即刻call佢loan，貸款個amonut又唔係大，只係4億元咁大把，好似唔想做生意咁，滙豐今次唔係儍咗的話，佢一定係知道一啲我哋唔知嘅嘢。
事到如今，無論滙豐知啲乜都好，事情會點發展先係最重要，學習大行推測方法：喺最差嘅情況下，單嘢可能係主席走佬，董事跳船，咁搞落去嘅話，公司情況將會同亞視一樣，等白武士出現。
事實上，呢個亦都係而家市場普遍對佳兆業嘅諗法。
但係情況發展落去亦都可以係，主席健康好轉，見公司唔掂所以重新出山，雖然未必救到滙豐call嗰筆貸款，但之後嗰十幾億元嘅違約就唔成立。
如果事情係咁樣發展嘅話，一向信任公司管理層嘅股東，即係到而家仲揸住嘅，當然係沉冤得雪啦，咁樣復牌後個價一定升返上去。喺近呢個月唔理價起勢狂沽嘅投資者就真係冤大頭，真係向好同唔好發展都有人唔高興囉。
李可強