敵人的敵人，就是朋友。斷估大家，唔係冇聽過啩？花生友最近就聽聞，建制派同泛民主派呢個藍黃敵對陣營，最近有個共同敵人，而呢個敵人嘅出現，係同年底嘅區議會以及明年嘅立法會選舉有關。
係人都睇到，上屆立法會選舉新界東嘅賽果中，最令人意外嘅就係以獨立旗幟出戰嘅方國珊，差四千幾票就可以最後一席入到立法會：由於吸票力太驚人，佢突然成為咗下屆新界東立法會選舉所有對手嘅假想敵。
兩派怕其立會出線
人稱哪吒嘅方國珊，又點會唔知自己有機會喺來屆立法會選舉出線？現為西貢區議員嘅哪吒肯定亦知道，只要守住佢嘅大本營將軍澳區，就有望由區議會升呢至立法會，所以佢喺將軍澳區極之努力，無論大小活動、街頭街尾甚至地鐵站、酒樓定係街市，都不難發現佢嘅影蹤；加埋佢賣力反對擴建堆填區，更加令佢喺街坊嘅心目中加晒分。
但對於西貢區嘅議員，無論係建制或泛民，原來都同樣覺得佢好難頂，罪狀包括只顧個人演出、同其他議員冇協商空間，喺區議會亦好唔合作等；當然最睇唔順眼嘅，可能係佢吸票力驚人，嚟緊有機會喺區選中跑出，係最具殺傷力嘅對手，所以大家密謀將佢踢走。
花生友聽聞，建制同泛民私下有個協議，只要建制派肯派人喺區選挑戰方國珊，泛民主派可以讓路，唔派人出選，以免分票，目的只有一個：唔好畀方國珊勢力坐大。
勢估唔到一個哪吒，竟然可以成為團結藍黃陣營嘅動力。
花生友