洛陽玻璃（1108）同阿媽互換資產搞重組，股價呢兩日升咗20%。嚟緊日子，中資股炒重組注資，肯定浪接浪兼係大主題之一。行家中國玻璃（3300）前排先引入大孖沙中國建材集團，中玻有好大想像空間。
估值平絕同業
中玻啱啱上年尾以每股1.04元，發2.6億新股（或已擴大股本14.36%），引入中國建材集團。後邊中建材直屬國資委，總資產值3,600億元人仔，折合4,500億港元，又係大孖沙級數！
中玻本身，又係祖國極少數可以生產低輻射鍍膜（LOW-E）同透明鍍膜（TCO）特種玻璃嘅企業，講技術，又係架勢堂。
呢次中建材集團入股中玻，斷估唔係無啦啦，尤其上邊講，央企改革如火如荼，而中建材集團又係阿爺點名，首批進行重點改革嘅央企。憧憬喺主打玻璃瓣數上有整合，或者中玻獲眷顧，獲注入項目，呢個推斷，好合情理。
中玻現價（1.04元），啱啱先上番配股價個位，市值18億元，得中建材集團0.4%，若果真係獲眷顧，快高長大。咪扯咁遠，中玻最新PB得0.6倍，洛玻連埋呢兩日股價一支箭，家陣PB係講緊高達22倍，場內另一間信義玻璃（868）PB亦講緊近1.4倍。中玻起碼平咗57%。
又場內專業評估，中玻就快派嘅2014年度成績單，EPS增長29%到8.75港仙，預測PE得11倍。中玻股東之一，日本嘅Nippon Sheet Glass（揸中玻22%），預測PE去到40倍，上邊洛玻冇預測、信玻近12倍，中玻又係至平一隻。
買中玻，當翻半番到1.56元計，PB先上到0.9倍，未有耐追到上邊行家之餘，總市值都係得28億元，亦只及信玻168億元嘅16%。
錢雋
細價股專家
本欄逢周二、三、五刊出