立法會議員之中邊個主持會議「最耍家」？唔使全民投票，八方都預計到，吳亮星一定跑出，事關佢上個立法會年度主持財委會，喺強行通過新界東北前期撥款時所展示嘅「功架」凡人莫及。
佢噚日又喺立法會露兩手！話說身為保安事務委員會副主席嘅佢，喺主席葉國謙因事離場後暫代做主席，一升呢佢又使出看家本領，想個會快刀斬亂麻，快快通過向財委會申請29億撥款，用作更換智能身份證，一度重施故技叫議員舉手表決，激到卿姐同張超雄等紮紮跳，反枱話議員都未問晒問題，禁止佢霸王硬上弓。星爺堅持要喺噚日會議通過，包括響鐘叫議員歸位投票，最後秘書處職員話法定開會人數不足，留待下次表決。