亞視拖糧，員工勒實褲頭返工，好多人都想幫佢哋度過難關。身為亞視舊員工嘅梁小龍噚日喺土瓜灣出席展覽活動時，就話早知亞視有今日：「兩三年前已經知會去到今日嘅地步，唔出奇，如果亞視執都係管理層問題，佢哋只顧自己，唔同以前互相幫忙，唔使大家孭鑊。」小龍仲越講越火：「嗰次亞視55周年台慶，叫我返去拎終身成就獎，但去到我屋企人連座位都冇，我話要走，冇留我不特止，個樣仲好似唔想頒個獎畀我咁。」
亢帥克拖星光幫籌錢
至於已離開亞視轉投黃柏高（Paco）旗下太陽娛樂嘅亞洲之子亢帥克，噚日接受新城訪問話好想搞籌款演唱會出吓力：「諗住搵埋星光幫一齊做，盡量籌啲錢幫吓佢哋，不過要得公司批准，但我唔係咁敢開口同Paco講。」至於Paco接受電話訪問話：「個提議係想幫舊同事，如果呢個籌款演唱會真係可以幫到亞視員工，我一定會支持。」另外，魏秋樺同亞視執行董事葉家寶前晚喺中環出席亞洲會慶功宴，佢哋話大家會一齊諗吓點幫手。
撰文：馮仁昭