騎士周日主場鬥小馬，本來係非常強勁嘅戲碼，但係大帝勒邦占士繼續養傷，連K艾榮都喺比賽中途傷出，就算路夫打出身價都唔夠照，結果以90:109大敗一場。不過，球隊總經理就否認球隊內部有問題，仲保證布拉特個帥位好穩陣㖭。
大帝連續第4場缺陣，當然係好大嘅打擊；不過，一個人嘅不幸，對另一個人就係一個機會。路夫過咗騎士之後，一路都冇乜點威過，難得最近可以擔正，今場就射入30分，創出效力騎士以嚟嘅新高。可惜隊波冇咗大帝，仲連主宰進攻命脈嘅控衞K艾榮，都喺第3節因背傷離場，連周一作客76人都出唔到。少咗兩件主力，騎士明顯唔夠甚有冠軍相嘅小馬砌，結果喺主場輸夠19分。
騎士戰績不濟，又頻頻傳出內亂，𠵱家連啲主力都接住傷，唔通連個天都唔鍾意教練布拉特？布拉特下台嘅傳聞最近越吹越盛，但總經理大衛格芬出嚟澄清，話絕對冇啲咁嘅事喎。佢又補充，話希望占士可以喺周五復出，趕及帶隊出征西岸嘅5場作客之旅。
傳查米斯搭上占士媽
雖然今場係主場比賽，但係占士竟然冇蒲頭，可能係因為預咗球隊俾人大炒，唔想再睇住隊友輸波咁面懵；又或者，早兩日爆出嘅一單新醜聞，令到占士唔敢出席公開場合見人住。曾經盛傳同大帝舊隊友迪朗韋斯有一腿嘅占士阿媽歌莉亞，最近俾八卦網站《Terez Owens》爆出又同大帝另一位舊隊友過電。歌莉亞雖然已經同饒舌歌手Da Real Lambo訂咗婚，但一樣咁花心；據講佢同細占士兩年嘅熱火控衞查米斯秘密拍拖，不過已經係過去式嘞。大帝「愛回家」嘅真正原因，唔通係因為邁阿密太多麻煩事，所以滾水淥腳咁走人？
識睇，一定係睇足英台【英波Live】：
http://soccer.appledaily.com
http://bit.ly/engballlive