特別報告，京都PK注意！日圓跌到阿媽都唔認得，好多朋友都去咗日本鳩嗚，尤其係京都大阪一帶，簡直俾港人攻陷咁滯。不過，親，鳩嗚之餘小心PK呀。（利申：費清唔係因為自己冇得去日本旅行，所以咁黑心！信我啦，唔係呢。）
＃溶雪要着毛毛長靴
其實，京都剛剛經歷咗大雪，積雪厚達22厘米，係1954年後，61年以來當地第一次積雪超過20厘米。雖然呢幾日已停雪，但因為氣溫回升，開始溶雪，京都周圍都好滑。喺京都做繙譯嘅靚女Crystal同費清講，佢呢幾日都見唔少人周街PK，「有個連人帶單車一齊仆㖭呀，大家唔好踩單車呀」，部份汽車就因路滑，上唔到京都出名多嘅斜路，所以要推車。
京都當然唔係第一次落雪，只係因為今年大雪嚟得早，又落得大，連當地人都準備不足，《每日新聞》都提醒婦女要小心。Crystal教路，落雪時着防水鞋，但溶雪應該着毛毛長靴，「因為啲寒氣喺地面飄上嚟，好鬼凍」，當然鞋底要防跣啦。
東瀛遊執行董事禤國全都話，已叮囑領隊提醒京都團友要「擔天望地」，因京都多簷篷，小心溶冰滑落中頭獎，亦要望吓地，避免踩到特別污糟嘅積雪，「黐咗污糟嘢嘅雪特別滑㗎」。
其實小心啲咪得囉，有街梗係去啦，唔好似費清同事季陶咁，去日本竟然匿埋喺酒店瘋狂睇《紅白》！
費清＃要生計，也要生活＃毋忘初衷