政改第二輪諮詢聽日展開之後，政改三人組會四出解畫sell吓方案，但去到下個禮拜三（14日），就輪到特首梁振英發圍，公佈新一份施政報告，唔畀三人組獨領風騷。之不過咁喎，原來喺公佈施政報告之前，梁振英做咗樣鬼祟嘢，就係取消咗向來都有嘅施政報告同財政預算案嘅三場地區諮詢會，點解呢？可能都有啲怕咗會好似財爺曾俊華咁中蛋喎！
「掟佢幾時都有機會」
話說梁振英上年發表施政報告前，都會喺之前搞地區諮詢，大家最記憶猶新，當然係財爺試過喺地區諮詢會，被社民連陳德章掟中雞蛋，但查實陳德章嘅目標係梁振英，財爺卻不幸誤中副車囉。哎，八方都好奇怪，施政報告都就嚟公佈啦，點解仲未有地區諮詢會嘅？
原來特首辦靜雞雞取消咗呀，而梁振英今次主要都係喺政總同禮賓府，聽吓政團、政黨同各界人士嘅意見，咁肯定唔會有人用蛋掟佢啦。
特首辦證實取消咗三場地區諮詢會，原因係考慮到當時、即係舊年年底嘅社會狀況同氣氛問題，強調市民或團體如果有意見，可以透過施政報告網站、電郵同電話向當局反映㗎。
查實社會狀況同氣氛唔好，特首係咪應該更要攞摺凳同拍子簿落區了解民情呢？八方問過陳德章，佢話梁振英選擇匿埋，虛怯到連落區公關騷都唔做，一啲政客嘅氣度都冇，但有信心一定還到隻蛋畀佢，「就算冇諮詢會，要掟佢幾時都有機會」。
李八方
mailto:[email protected]