廠商會舉辦嘅「第49屆工展會」噚日閉幕，唔少鳩嗚市民都滿載而歸，攤檔商戶亦笑笑口，相信生意都唔錯。閉幕之時，亦係新一屆工展小姐誕生之際。到底邊位工展小姐最後艷壓群芳？原來由代表威馬企業有限公司嘅馬穎敏摘得后冠，其實佢早前已經攞咗「最具魅力獎」及「最佳口才獎」，算係大熱跑出。
亞軍則由深偉國際有限公司代表張殷慈獲得，佢同時係「最合眼緣獎」得主；季軍則係昇鋒國際有限公司代表鄭伊琪。
「最具才藝獎」早前則由維特健靈健康產品有限公司代表何瑩瑩攞咗。廠商會副會長吳永嘉都讚冠軍實至名歸；埋單計數，今年工展會總銷售額再創新高，突破去年8億達到超過9億，吳永嘉對此佳績話滿意。