美元強勢下，歐元、日圓跌，加埋油價連帶燃油附加費跌，新一年簡直係旅遊年！想旅行使錢使得精明？最近睇動新聞財經節目，提醒買日本機票來回分開買，因廉航買回程係用日圓計，賺咗個匯率。
至於住方面，唔少人試過用短租服務網站Airbnb租民宿後都讚口不絕，朋友馬丁去完大阪，話4個大人加兩個B，成間屋畀你都係2,000蚊一晚，仲想點？Airbnb呢間startup又係另一個分享經濟典範，2008年成立至今，業務遍全球逾190個國家，估值達130億美元，更傳公司考慮今年IPO，加埋電召的士App Uber，相信初創IPO市場會幾熱鬧。
股市方面都唔弱，中資股成為升市火車頭。內房股㷫烚烚，連帶部份低迷好耐嘅內房全部大彈。其中，中糧置地（207）值得望多幾眼。國資改革概念勢成今年炒作主題，內地更傳出，農曆春節前內地會公佈國企改革方案，所以概念要炒就要快。中糧置地母公司中糧集團，為六大改革試點央企之一。集團最近已加快改組步伐，旗下我買網引入戰略投資者，其他下屬企業亦有望作出相同舉動。中糧置地上年9月，以124億元購入母公司大悅城品牌的綜合項目，打入內地市場。中糧置地股價昨日突破阻力，更集中資、內房、注資、引革概念於一身，博得過囉！
Fifi
http://www.facebook.com/lovefrystock
本欄逢周二、四刊出