亞視員工11月仲有半份糧未有着落，12月嘅糧，又唔知幾時出到，為咗符合廣播條例等白武士打救，新聞部仍然有唔少人繼續堅守崗位，包括身在廣州嘅記者黃迪瑋。
女主播爆肚惹誤會
噚日黃迪瑋搵咗隻講當地舉行失戀展嘅趣聞，放喺午間新聞時段出街，點知女主播喺讀引言嘅時候，居然臨場爆肚加一句「記者黃迪瑋就感受最深啦！」播完之後仲疑似忍笑話新聞報道完畢，搞到唔少人以為黃迪瑋啱啱失戀，連網台節目主持人雲海，其後都拍片放上YouTube賀一賀佢：「今（噚）日之後全世界都知佢失戀！」
八方事後問過黃迪瑋，佢話報道一出街就有人同佢講呢件事；對於畀同事擺上枱，佢只係回應咗個無奈嘅表情，強調自己唔係失戀：「感覺深唔一定係失戀」。
問到駐內地記者嘅生活津貼𠵱家點算？佢話暫時一切如常冇俾人cut，見到亞視行家喺咁困難日子下仲可以苦中作樂，八方不得不講句：加油！