佔領行動告一段落，市民又過番塞住車返工返學嘅「正常生活」。為咗提醒善忘嘅香港人，可以繼續用鳩嗚、倒數、掛直幡去抗爭，向來有創意嘅高登仔推出一隻以佔領行動做主題嘅戰略遊戲，實行一邊打機一邊毋忘初衷。
可自選立場
呢隻叫《香港無雙──雨傘革命》嘅戰略遊戲，係由高登巴打「黃權」用另一隻港人開發嘅獨立遊戲《民國無雙》改寫而成。
玩家可以從學生、群眾、政府等13個勢力入面選擇自己嘅立場，喺遊戲中重溫佔領期間嘅角力，重現「龍和道攻防」或者「重奪旺角」亦得，唔同嘅勢力都有唔同嘅「將領」，梁振英、戴耀廷等都會上陣幫你「攻城掠地」；至於佢哋嘅部隊都各有特色，好似何韻詩會帶領「藝人」用歌聲去射擊。
作者仲跟住成個佔領過程，配合新聞圖片整咗二百幾個「歷史事件」，當中有真有假。
八方試玩過，發現勢力分佈果然貼近現實，政府勢力遍佈全港，而且人強馬壯，作為佔領勢力要贏真係唔容易。
遊戲配樂亦體現作者嘅心思，佔領一方係用《問誰未發聲》，政府同中央分別係用《始終有你》同《沒有共產黨就沒有新中國》，有興趣不妨下載嚟試一試。