之前嘅佔領運動，咪有好多學生喺畢業典禮舉黃傘嘅，唔少人都撐學生，話個畢業典禮係學生嘅主場，如果佢哋想趁機表態，都未嘗不可吖，但同時亦有唔少港人覺得，咁樣做好似唔係太禮貌喎，始終都係成群同學一齊擁有嘅畢業禮，黃絲學生咁樣做，係咪有啲騎劫意味呢？好多政界中人喺飯局上，原來都為此拗餐飽。
頒發前先面試
嗱，花生友隔岸觀傘，覺得唔係太影響人都冇乜問題嘅，但估唔到對於工商界，呢啲黃傘唔係擋風擋雨而係倒水咁滯。此話何解？花生友聽聞，早前商界中人坐埋一枱，除咗呻吓佔領搞到香港生意差咗之外，仲有唔少人分享心底話，佢哋覺得啲大學獎學金，如果頒畀啲撐黃傘嘅學生，唔係咁抵囉，冇理由供佢讀書去作反㗎！
至於係咪撤回獎學金嘅捐款？聽聞唔少人覺得，如果啲款項都係得嗰萬零蚊，掉咗都唔覺嗰隻，咁就算數啦，舉例話如果好似俊和集團咁高調話撤，公眾形象肯定會扣分，集團又受影響，一動不如一靜嘞。點解決好呢？花生友聽聞，有啲商界中人覺得，如果係商會名義頒嘅獎學金，大可以喺頒發前搞吓面試，了解吓政治意向先出賽果，覺得咁樣先捐得心甘命抵！乜佢哋唔驚，呢種變相政治審查，後果仲嚴重，例如俾人唱衰同起底咩？若然真係有面試機制，相信唔少學生寧要骨氣都唔要錢囉！
花生友