【荷李活票房】之前被睇淡嘅《哈比人：五軍之戰》（The Hobbit：The Battle of the Five Armies），今次可謂吐氣揚眉，電影雖然已經上映咗第3周，但喺新年後首個周末，依然延續強勢，冧莊連續三個周末成為咗美國票房冠軍，過去周末三日就有2,190萬美元（約1.69億港元）票房進帳，加上口碑唔錯，海外票房亦累積咗5億美元（約38億港元），彼得積遜（Peter Jackson）今次都算埋個靚齋，嗒得杯落。
至於《魔法黑森林》（Into the Woods）同《非凡生命歷》（Unbroken）喺美國上映第2周，都鬥得叮噹馬頭，分別有1,900萬美元（約1.47億港元）及1,830萬美元（約1.41億港元），打入美國周末票房第2同第3位。
撰文：房早鳴