噚日資金炒作兩個主題，第一，大折讓H股，尤其深圳上市嗰批，原因係國務院總理李克強講話滬港通之後就有深港通，深圳同時上市嘅大折讓H股即刻炒上。資金開始由內房股流去資源股，原因係李克強亦講到要完善出口退稅政策，呢番言論間接將過剩產能進一步輸出海外，噚日銅、鋁、鋼，以至貴金屬，甚至煤炭、化肥股都起動。除非A股即時見頂，否則以之前券商股、基建股同內房股炒上去嘅模式，金屬資源股應該仲有得去。
值得留意嘅係，個別金屬資源股技術走勢相當靚，鞍鋼突破向上傾嘅旗形阻力，動力非常強勁。至於中國鋁業（2600）亦形成杯柄形態，噚日大陽燭理應係一個開始，中長線故仔未完。
揀強勢板塊之中嘅強勢股，有個中長線靚圖表，更加要畀多兩分尊重。鋼鐵同鋁股嘅共通點，就係大家都係中央致力淘汰落後產能嘅行業。據了解，2014年，鋼材、電解鋁、玻璃等等產能過剩行業，都幾乎嚴禁起新廠計劃，同時落後產能就要淘汰，換言之，可見將來中國鋼鐵業產能都只會跌，唔會升，為嘅係快啲可以令行業供求平衡。隨着增加出口，同埋內地基建項目上馬，增加鋼材需求，未來產能過剩收窄速度可能加快。不過，鋼鐵業產能過剩情況都頗為嚴重，要供求平衡不可能係2015年能夠達成嘅事。
中長線睇10元
與此同時，鋼鐵股業績已經搶先一步見底回升。原因係作為鋼鐵主要生產成本嘅鐵礦石，價格下跌速度快過鋼價，2014年，國際鐵礦石價格下跌接近五成，但根據中國鋼鐵工業協會數據，2014年11月底鋼材綜合價格指數85.29，較2013年底99.14下跌14%，相信全年跌幅唔會超過兩成，令到鋼鐵企業毛利率反而擴闊。
鞍鋼（347）首三季賺9.23億元人民幣，按年升兩成，預計未來業績可持續改善，目前市賬率0.93倍，長線睇兩至三年內地鋼鐵業好大機會比而家好景，盈利能力強勢回歸，估值要升，可以大把空間升。
鋼鐵股都牽涉唔少當炒概念，先因為負債重，受惠減息、降準；同時一帶一路增加鐵路、水利等等基建項目投資，亦刺激鋼鐵需求。 基本因素好轉兼炒作概念有齊，股價仲啱啱突破營造超過三年嘅潛伏線頸線，單睇圖已經係長線大升格，有耐性嘅話，中長線首站睇10蚊，中短線就睇住8蚊先，跌至6蚊止蝕。
版面調動關係，晉佳暫代王昇一天。
晉佳
http://www.facebook.com/pages/晉佳/719009541518415