14歲「粉筆少女」以粉筆喺金鐘政府總部外嘅連儂牆畫花，一度被判入屯門兒童及青少年院，唔少團體喺啱啱過咗嘅周日聚首連儂牆，聲援呢位粉筆少女，批評當局借兒童保護令作威嚇，製造白色恐怖。
八方發現當日逾百名撐場市民中，包括歌手何韻詩。其實一場雨傘運動，大家都知道何韻詩嘅爭普選決心有幾堅，對唔公平嘅事，佢都不平則鳴。但當日同埋一班文化監暴成員到場支持嘅佢，就比較低調，冇乜回應傳媒提問，默默成為當中一分子，似乎以免太高調無啦啦成為焦點就唔好。
雖然佢低調，但逃不過市民法眼㗎，八方見到唔少人見到佢都非常雀躍，拉住佢合照留念，而何韻詩亦笑笑口來者不拒，非常親民。