《經濟日報》副社長兼研究部主管石鏡泉同東亞銀行（023）嘅關係應該十分之好，否則，佢噚日唔會病到五顏六色，都畀面出席東亞銀行（023）搞嘅經濟展望研討會喇﹗佢仲要由朝早9點坐到12點半，中間上台講股嗰陣，見佢講到眼矇矇兼咳住咁講，一副病樣，認真陰功豬。
東亞每年年頭例牌舉行經濟展望研討會，畀投資客戶了解投資環境。石鏡泉上台戴住口罩分析中國改革進程，又畀揀股貼士，講足半粒鐘，其實佢病到聲都拆埋，講兩句又乾咳幾吓。
可能好鬼病，影響佢講股表現。石鏡泉最初話「塊塊板塊都睇好」、「升市中有股跌，跌市中有股升」、「揀股要有實力、有盈利前景」，即係阿媽係女人之類，好在最後佢都畀咗啲實在少少嘅貼士，話睇好金價長遠走勢，如果投資者長遠睇好，可用閒錢買江西銅（358），佢仲識搞笑咁話，「你哋唔好買咁多，買貴晒！」