踏入2015年，如果說「基金看好A股」，海迪會認為呢個陳述未足以表達實際情況。現實係：芬佬朋友最近每逢收到經紀或分析員的電話，除非對方係打算同自己講A股，否則可一律收線。所以話，佢哋點只係睇好A股咁簡單？直頭係除咗A股，其他幾乎唔睇。
點解做到咁絕？事關現時大市主要跟宏觀走勢上落，一般research部門所謂捕捉個股bottom out的技巧，喺現時市況，根本無用武之地。況且要你望晒港股咁多個sector，想搵一隻港股來「long吓」（持有長倉）都好困難，只有A股有望納入MSCI指數的故事，仍然夠sexy。所以朋友就話，至少在上半年，唔使諗咁多，齋睇A股已經OK。
不過，這對從事Buy-side的香港人來講，又有衍生出另一個難題：除非基金公司是內地背景，否則香港人走去買A股，始終係隔山買牛，即使每日睇雪球討論區，都係二手消息，你敢買，都唔敢買得多。如一味揸住隻A50，咁作為一個芬佬你仲有咩edge呢？仲唔畀客鬧？今年無論Sell-side還是Buy-side，都好難做。
因此，香港金融從業員今年會強烈感受到市場焦點正逐步快速向北移的事實。
長遠而言，應如何面對自身技術與需求或已出現mismatch的問題？值得我們三思。
海迪