唔知點解無綫呢排好多疑似爆粗事件，好似繼日前《東張西望》嘅霸氣叔聲演疑似粗口版「睇住呀！」之後，上星期六（3日）播嗰集《學是學非》，主持麥美恩亦疑似爆粗。話說當日麥美恩同另一個主持梁嘉琪做緊一個科學實驗，將提子放入微波爐叮，有網民話聽到麥美恩見到實驗中提子着火嘅時候好驚咁話：「嘩！好X驚！」麥美恩見身邊嘅梁嘉琪冇乜反應，繼續講：「啲提子同我哋啲是非精一樣好有火花呀，哈哈！」馮仁昭睇番段片好多次，聽到麥美恩講嗰句似乎係：「有火喇已經！」唔知係咪因為佢講嘢 𦧲脷，所以聽落令人有誤會係爆粗。
有內部審查
噚日馮仁昭打電話問番麥美恩，佢聽到自己爆粗都忍唔住笑：「哈哈！冇啲咁嘅事，現場聽冇事㗎喎。全部冇粗口成份，現場有PA（助導）有writer（撰稿員）有導演監督住，應該冇事，公司有內部審查，會唔會有啲誤會呀？」問佢記唔記得自己嗰句應該係講乜，佢就話：「字幕打咗出嚟㗎喎，我應該冇講唔啱嘅說話，我平時都唔會講呢啲（粗口）。可能我講中文、英文歪歪哋音，好似不雅，但佢哋會即刻提我，出得街應該check得好清楚。」
撰文：馮仁昭
