人人話雨傘運動後，香港嘅媒體生態出現結構性變革，除咗網媒好似雨後春筍咁爆出來，就連傳統紙媒都好似有番啲曙光，噚日本地老牌報紙《成報》嘅母公司成報傳媒（8010）亦預告今年幾項大計。
成報計劃重新推成報網站平台以外，更會喺本月起推四本唔同類型嘅周刊，包括新聞周刊、娛樂周刊，仲有一本本地趣聞周刊，講明要集中報道幽默嘅評論文章、政治文化同本地趣聞，對象係年輕人。最後一本就係針對大專生市場，免費喺各大院校派發。
成報自2005年起停牌至今，舊年谷卓恒做咗主席後開始活躍，除大搞《成報》成立75周年酒會外，早前又話同內地政府喺貴州合作搞文化產業園項目。根據成報通告，谷卓恒活躍於中、港礦務、基金管理同房地產投資，家陣係鼎和礦業（705）大股東。咦，地產商人搞傳媒，熟口熟面喎，咁似王征同亞視呢個組合嘅？