足總盃第3圈爆唔爆冷，都大唔過謝拉特竟離利記嘅足壇大新聞，有排講，講到佢季尾喺晏菲路感人告別。英國波的確走得很快，名利一瞬間，忠臣、名宿，都係講利用價值，長情球迷，惟有硬食。
謝老四上周五震碎紅迷心，宣佈季後「自願」離開利記，球迷會發覺，這一年紅軍喺英超走得最快。上年年頭，就係利記自英超1992年成立以來，該會為爭霸，發動最猛烈攻擊之開始；自1月1日主場贏侯城2:0之後，在聯賽再取13勝2和不敗，冠軍味道飄得好近。
至4月尾鬥車路士，謝拉特上半場跣腳……冠軍最終溜走。此後利記運氣，未回高位，連老隊長，如冇戲劇性變化，都唔可以喺母會終老；少帥羅渣士先引入大量新兵，再勸到忠臣離隊，過渡期中，今季兩手空空不奇。
無論自願也好，被迫走也好，冇考教練牌，一生只為紅軍打拼嘅謝四，今夏35歲先出走，橫越大西洋初戰美職聯，對「神奇隊長」唔容易適應。當年嘅開荒牛好似英超球星碧咸，或者較後嘅亨利，喺開頭兩、三年仲可以也文也武，星味甚濃。睇番賣樣賣七旋斬嘅碧咸32歲去銀河前，喺歐洲踢咗386場頂級賽事；亨利天生射手型，又少傷患，臨33歲投紅牛前，踢過455場，攻入232球，喺美職4年半，平均每場入0.42球，球會攞咗兩次東岸冠軍，份超高薪，場內場外算交到貨。
謝四，估計去到季尾，應該可以單一為紅軍，突破上陣500場比賽，呢份履歷表喺英超難能可貴，屆時喺晏菲路告別，值得英超迷起立致敬；忠心不能賣，賣鬥志，賣長傳，仲有冇餘力喺美職發光發熱？連謝四喺國家隊嘅「天敵」、不能並存嘅林柏特，36歲原本一心一意今夏過美職聯；結果命運不在自己手，啱啱應承留多英超半季，續留曼城，𠵱家已成為母會車仔今屆要重奪冠軍的重要敵人，車迷難受，也要硬啃。喺美職，東西兩岸奔走比賽，同家人聚少離多，少份鬥心，不容易捱；睇30出頭嘅迪科爾仲攞到7、8萬鎊周薪，上年初轉踢FC多倫多幾個月已頂唔住，想今個月返英超，可見一斑！
今晚足總盃第3圈尾門獨腳戲，愛華頓同韋斯咸𠵱家嘅走勢，同上季比已經係相反；「拖肥糖」差到冇朋友，4連敗兼成籮傷停，單係冇咗美國鋼門侯活，就算主場已經唔值熱捧。「槌仔幫」韋斯咸冒起，但要爭聯賽前4踢歐聯亦唔易，希望大Sam哥轉性，肯強陣爭吓盃仔啦，受讓幾穩陣！
文：波神